ni Abee E. Castardo/PPIO-AgSur


Mipaubos  na sa ilang unang adlaw nga pagbansay sa Cash for Training Project kon (C4TP) ang 33 ka benepisyaryo sa Barangay Sinobong, lungsod sa Veruela niadtong Marso 11 aron sa ingon mas mapalambo ang ilang kahanas sa pagpamanday og balay.

Ang C4TP gimugna sa Department of Social Welfare and Development (DSWD) nga gitambayayongan sa Technical Education and Skills Development Authority (TESDA).

Ang nahisgutan nga pagbansay gilangkuban sa carpentry, masonry ug mini wiring installation diin mahitabo sulod sa 13 ka adlaw gikan sa pagdawat nila sa ilahang nagkadaiyang tool kits.

Matag-benepisyaro, gigahinan og P20,000 alang sa ilang scholarship voucher, assessment fee, entrepreneurship, allowance, tool kits ug training cost.

Sulod sa 13 ka adlaw, gilauman nga makahulma og duha ka modelo nga balay ang mga trainees isip resulta  sa ilang pag-training ug kini magpamatuod nga sila nakakat-on gayud.

Ang programa gisugdan sa lungsod sa Sta. Josefa ning probinsiya diin 40 ka mga trainees ang nakatapos.

Kahinumduman nga usa ang lungsod sa Veruela sa daghanang apektado sa pagkuso-kuso sa Bagyong Pablo niadtong milabay  tuig nga miresulta sa pagka-wagtang sa pinuy-anan ug panginabuhian sa mga residente ug sa padayon nga pagbangon sa lungsod, ang maong oportunidad miduol kanila ug mao kini ang usa sa programa ni Pangulong Benigno “Noynoy” Aquino III.

Si Engr. Braulio P. Dela Peña ang Regional Operations Division Chief sa TESDA sa iyang mensahe atol sa gipahigayon nga paglusad sa proyekto, midasig sa mga iskolar nga humanon ang training sanglit usa na kini ka dakong oportunidad ug tabang alang kanila nga wala’y natapos nga kurso.

Gi-awhag usab sila ni Mayor Salimar “Loloy” Mondejar nga seryosohon ang maong training aron sa higayon nga matapos na nila kini, makatabang usab sila sa padayon nga pagbangon sa Veruela.

Ang duha ka benipisyaryo sa balay nga sila Mario Balliong, 32, ug Merle Echavez, 39-anyos, kinsa managsamang pamilyado ang labihan ka mapasalamaton sa proyekto sanglit matud pa nila makaangkon na sila og libreng balay sa higayon nga matapos na sa mga trainees ang ilang pagbansay.

Ang mga nasangpit, sa kasamtangan nag-antos lamang og puyo sa ilang kaparyentehan sanglit wala matud pa sila’y mahimo alang sa pagpatukod og bag-ong pinuy-anan.

Prayoridad sa Cash for Training Project ang lungsod sa Bunawan, Trento, Sta. Josefa ug Veruela sa probinsiya nga maoy natalang labihan nga gikuso-kuso sa milabay nga Bagyong Pablo.